Act 23 | WSK | STEP | Paul supuling supuling nungarki kuawuwa se balam, “Aga singsang, ani Kaem koma te baga se mel bo bitirik ale ko nguangirikko me beterem tai aitak tom imi.”

Acts 23

1 Paul supuling supuling nungarki kuawuwa se balam, “Aga singsang, ani Kaem koma te baga se mel bo bitirik ale ko nguangirikko me beterem tai aitak tom imi.” 2 Nu uwuta balam, se Priest Supuling Ananias mu kari Paul kumik duap te sanamiwaman mu ko kore sumulak te momonko balam. 3 Se Paul nu maonam, “Ni kawam naung memek bare kumik guang bala tuman wore iwita! ^{▼▼Acts 23:3 Den Paul balam imi mu den sang Jesus Pharisee alo nunga maonam wore turan: Mat 23:27.} Se Kaem ka morukkowo! Ni Law Den te aninga den tuterko imi te daigem, bare ni keta den umutang kiarem ale aninga momonko balem!”

4 Se kari pingi sanamiwaman mu Paul manorman, “Ni Kaem ko Priest Supuling balu maguwurko me nguangasam e?” 5 Se Paul balam, “Aga singsang, ani nu Priest Supuling mu me ko ikiem. Ani ikisam, Kaem ko den te balso, ‘Ni kariimet nunga supuling me balu maguwurko!’ maso. ^{▼▼Acts 23:5 Exodus 22:28.}

6 Paul nu ikiam priest bibiya se supuling bibiya nunga ningi sang mu Sadducee, se sang mu Pharisee. Se nu biyala balam, “Aga singsang, ani Pharisee kari, ani Pharisee nunga kuriang. Ani kariimet kueman wore aking barasomonko mu ko den balsam. Se mu ko ani den te sanamiwasam.”

7 Nu den umu balam mu te Sadducee se Pharisee alo den tagiman ale biguwura mu kusumuri pagam. 8 (Sadducee alo balsan kuera ale aking udagi ko barasa bo mena masan, ale engel se bur duap duap bo mena masan. Bare Pharisee alo mu balsan mel mu suen la nunguningta masan.)

9 Se nirung biya barasam. Se Law Den ko kausa kari saki, Pharisee ko, mu barasaman ale sail ago balukasan, “Ana kari imi kumik te memek bo me aringiman. Bare nunguningta engel agi bur bo agi ilak munakaram agila!”

10 Se nirung nama laga kaparam, se kager kari supuling nu Paul ilumon ale tagi gurugumon se kumik sail piripirik mauk wore ko nguangaram. Ale kager kari nunga maonam, nama kapomon ale nunga ningi tagi batagarmon ale ilak nunga kawam te namomonko balam.

11 Se turom umu te Kari Biya Paul kote aratam ale balam, “Ni sokel ago bagerko,” mam. “Ni imi te Jerusalem ningi aninga dugu duap kariimet nunga manem iwitatala, Rome ningi nunga manaruko,” mam. ^{▼▼Acts 23:11 Kari Biya sokel tua ko den Paul maonam: Acts 18:9; 27:24.}

Paul momon se kuerukko den kaloman

12 Ukiram se Juda saki tai bolala awuman ale den nungurman, ale balman, “Nunguningta nunguning ana balsan, ana na yu me nanak baga Paul monak se kueruk asele ko,” ma balman. 13 Kari den mu nungurman mu nunga tom 40 ko kualala. 14 Ale nuna priest bibiya se supuling alo nongote namaman ale balman, “Ana den nungurman ale nunguningta nunguning maman, ana na yu bo me nanak baga Paul monak se kueruk asele ko ma balman. 15 Buta se nina se Sanhedrin kari supuling suen la arungu den beteral se kager kari nunga supuling kote namurukko, nu Paul ilak nengete tai kapuruk se ko den duap ninguru ikialko ma balalko. Bare ana mu nu imi te me tai aratuk la, ana nu monakko sinar ago baganakko.”

16 Bare Paul ko nugar mu nu Paul momonko den ikiam, ale kager kari nunga kawam te namaram ale Paul maonam. 17 Se Paul kager kari supuling bo auram se kote tairam se balam, “Kari kulak imi to ale ilak ninga supuling kote namarko. Nu den bo manukko se.” 18 Se nu tam ilak kager kari nunga supuling biya kote namaram. Ale balam, “Kari Paul i talipara ningi bagoso wore aninga auram se namerem, se balam, ani kari kulak imi taik ale ilak kete tairikko mam. Nu den bo nikerak munakurukko wore karogo se.”

19 Se kager kari nunga supuling mu kuriang kulak mu tam ilak tagi tam, ale isuam, “Anape den aninga manaruko ya?”

20 Se nu balam, “Juda alo den nungurman, ale nika isarmon se ukurukse Paul ilak nama kapar se ko den duap ninguru ikimonko balman, bare mu kawelasan. 21 Ni nuguring me ikiko! Mu awuk, nunga ningi kari 40 ko kualala mu lage te yumu se anisan, nu namawuruk se aratomon ilumon ale momonko kimi bita se anisan. Mu nuna balman, na yu me ta namon baga Paul momon se kuerukko maman. Bare ni aing meko ko kimi bita se anisan.”

22 Se kager kari supuling mu kuriang kulak mu maonam, “Ni den sumu aninga manem mu kari awiriya me manaruko,” mam. Ale beteram se namaram.

Paul taman ilak Caesarea namaman

23 Asele kager kari nunga supuling mu supuling ilagala noko bowa ningi mu nunga auram se taiman se nunga maonam, “Kager kari nosowek te ko mu 200 nunga gial, ale horse te ko mu 70, se saki gatu ago mu 200 nunga gial, ale turom 9 o'clock Caesarea namaralko mu ko sinar ago bagaralko. 24 Ale horse sang Paul te namurukko mu karogo nunga awural se animonko. Se nina ninguru ko sinar to se ilak nama ali supuling Felix kote aratalko.” 25 Asele nu tam gawa bo iwita batogam:

26

Ani Claudius Lysias, ani tam gawa imi bataguru ni Ali Supuling Kari Biya Felix kisisam. Woremkalal yawara.

Juda alo kari imi iluman ale momon se kuerukko tom pingi aram. Bare ani den ikiem mu nu Rome kari, se ani aga kager kari arungu namerem ale nuguting te bataguru taem.

28 Ani duap aguwaya se den te atumukasan wore ikiekko ilak nunga kari supuling alo priest bibiya nongote namerem. 29 Ale ani arigem, mu memek bo bitiruk se ko ana nu monak se kuerukko mu mena, se talipanakko mu mena tala. Mu nuna nongota nunga law den ko den tagiman, ale nu den ningi bita se animan. 30 Se udagi kari bo aga maonam, kari sumu momon se kuerukko ko den nungurman mam. Se ani ikiem umutang ani tairatela beterem se nikate namoso. Ale ani kari ari nu den ningi beteman mu nunga manem, nuna anapeya ko kari sumu den te atumusan wore ka manarmonko balem. Tam gawa te den uwutata batogam ale ko kager kari mu nungaram. 31 Se nuna tam gawa taman ale nu nunga maonam butata beteman, ale turom Paul taman ale ilak Antipatris namaman. 32 Ukiram se kager kari horse te mu Paul ilak aking namakasan. Se kager kari saki mu peleman nunga kawam te namaman. 33 Se kager kari horse te mu ilak nama Caesarea arataman, ale tam gawa ali supuling Felix tuman, ale Paul nu kuting te beteman.

34 Se ali supuling mu tam gawa mu kauram, ale Paul isuam, “Ni wonong sor awuk bore ko?” mam. Se Paul balam, “Ani Cilicia ko,” mam. Se nu balam, “Ani kari ni den te ka atumuman mu tai aratomon asele ani nika den arigekko.” Ale balam, Paul Herod ko kawam biya mu ningi kager kari ninguru bitarmon ilak bagomonko mam.

35